कृषि विश्वविद्यालय रामपुरले तितेपातीबाट निकाल्यो स्यानिटाइजर

रायुजा डेक्स समाचार
१ नम्बर प्रदेश, विराटनगर, ९ वैशाख २०७७ । रामपुर चितवनस्थित कृषि तथा वनविज्ञान विश्वविद्यालयले तितेपातीको स्यानिटाइजर उत्पादन गरेको छ । विश्वविद्यालयको जैविक प्रविधि केन्द्रले उत्पादन गरेको स्यानिटाइजरमा इथानोल, ग्लिसिरोल, हाइट्रोजन पेरोअक्साइड र तितेपातीको समिश्रणबाट स्यानिटाइजर उत्पादन गरिएको हो ।
तितेपाती प्रयोग गरी बनाइएको स्यानिटाइजर पहिलो प्रयोग भएको विश्विद्यालयका उपप्राध्यापक सरोज सापकोटाले जानकारी दिए । सो स्यानिटाइजर विश्व स्वास्थ्य सङ्गठनको मापदण्डअनुसार तयार पारिएको उनको दाबी छ ।
केन्द्रले पहिलो चरणमा १८० लिटर स्यानिटाइजर उत्पादन गरेको र २० एमएलको बोतलमा प्याकिङ गरेको जनाएको छ । स्यानिटाइजर सोमबार (८ वैशाख) देखि प्रयोगमा ल्याइएको छ । जिल्लाको नारायणगढ र नवलपुरको गैँडाकोट क्षेत्रका तरकारी तथा फलफूल बिक्री गर्ने व्यवसायी तथा कृषकलाई निःशुल्क रूपमा वितरणसमेत गरिएको छ । राससका अनुसार स्यानिटाइजर वितरणको अवसरमा विश्वविद्यालयका उपकुलपति प्राडा शारदा थपलिया, भरतपुर महानगरपालिकाका प्रमुख रेनु दाहाल, जैविक प्रविधि केन्द्रका निर्देशक डा ईश्वरीप्रसाद कडरिया, कृषि ज्ञान केन्द्र चितवनका प्रमुख राजन ढकाललगायत उपस्थित थिए ।