Rashtriya Yuva Jagaran
Online Digital News

शान्ति मिसनमा महिला सहभागिता बढाउन संयुक्त संघलाई आग्रह

रक्षामन्त्री पोखरेल र राष्ट्रसंघका महासचिवबीच भेट

काठमाडौं, २६ चैत्र २०७५ । उपप्रधान तथा रक्षामन्त्री ईश्वर पोखरेलले अमेरिका भ्रमणका क्रममा संयुक्त राष्ट्र संघका महासचिव एन्टोनियो गुटरेससँग भेट गरी शान्ति मिसनमा महिला सहभागिता बढाउन आग्रह गरेका छन् ।
प्राप्त समाचार अनुसार बिहीबार भएको भेटमा विश्वमा शान्ति स्थापनार्थ संयुक्त राष्ट्र संघले खेल्दैआएको भूमिका विषयमा छलफल भएको रक्षा मन्त्रालयले जनाएको छ ।
भेटमा संयुक्त राष्टसंघको भूमिकालाई थप सवल बनाउँदै लैजानुपर्ने आवश्यकताका विषयमा पनि छलफल भएको छ । त्यस्तै शान्ति स्थापनाका लागि नेपालले ६ दशकदेखि खेल्दैआएको भूमिका बारे उल्लेख गर्दै शान्ति सेनामा खटेर जाने सुरक्षाकर्मीहरूको रक्षा, सुरक्षा र सम्मानप्रति नेपालको चासो प्रस्तुत गरिएको मन्त्रालयले जारी गरेको विज्ञप्तीमा उल्लेख छ ।
शान्ति सेनामा महिला सहभागिता र नेपाली शान्ति सेनाहरूले राष्ट्र संघको मुख्यालय र शान्ति मिसनहरूमा समेत नेतृत्वदायी तहमा भूमिका खेल्नका लागि अवसर प्राप्त हुनुपर्ने विषय पनि नेपालले राखेको छ ।
नेपालले आफ्नै विशेषताका आधारमा शान्तिप्रकृया टुंग्याएको , नेपालको शासन प्रणालीमा आम नेपालीहरूको सहभागिता एवं समावेशिता सुनिश्चित गरेको र अब आर्थिक रूपान्तरणको अभियानमा जुट्दा संयुक्त राष्ट्र संघको भूमिका महत्वपूर्ण रहेको पनि विज्ञप्तिमा उल्लेख गरिएको छ ।
भेटमा महासचिव एंटोनियो गुटेरेसले नेपालले खेल्दै आएको भूमिकाको प्रशंसा गरे र आगामी दिनमा संयुक्त राष्ट्र संघले नेपाललाई सकारात्मक रूपमा सहयोग गर्ने प्रतिबद्धता जनाएका छन् ।

Leave A Reply

Your email address will not be published.