Rashtriya Yuva Jagaran
Online Digital News

कैदीका लागि पुस्तकालय, उद्घाटन चैत्र २३ गते हुने

सुर्खेत । कर्णाली प्रदेशले कैदी बन्दीहरुलाई लक्षित गरेर सबै कारागारमा पुस्तक पढ्नका निम्ति पुस्तकालय स्थापना गरेको छ । प्रदेश प्रहरी कार्यालयको अगुवाइमा सबै कारागारहरुमा पुस्तकालय स्थापना भएको उक्त पुस्तकालयको उद्घाटन यहि चैत्र २३ गते हुँदैछ । आवश्यक पुस्तकहरु विभिन्न व्यक्ति, समूह, प्रतिष्ठान, पुस्तक व्यवसायी, प्रकाशन गृह सबैबाट संकलन गरिएको छ ।

पुस्तकालय स्थापना गर्नका लागि डिआइजी महेशविक्रम शाहको संयोजकत्वमा गठित समिति र जिल्लामा गठित उपसमितिहरु मिलेर जम्मा ८ हजार ३ सय ८८ वटा पुस्तकहरु संकलन गरेको थियो।
संकलित पुस्तकहरु कैदीहरुको संख्याका आधारमा प्रत्येक जिल्ला कारागारहरुमा पठाएर पुस्तकालयसमेत स्थापना गरिसकिएको डिआइजी शाहले जानकारी दिए। देशका विभिन्न प्रकाशक र लेखकहरुले महत्वपूर्ण पुस्तकहरु उपलब्ध गराएको शाहको भनाइ छ। संकलित पुस्तको मूल्य २१ लाख बराबर रहेको छ। जसमध्ये कर्णाली प्रदेश सरकारको सामाजिक विकास मन्त्रालयले ५ लाख बराबरको पुस्तक उपलब्ध गराएको हो।
कर्णालीका दश जिल्लामध्ये ८ वटा जिल्लामा मात्रै कारागार रहेको छन्। तर, मुगु र हुम्लामा पनि कारागार स्थापनको पहल भैरहेको छ। ती जिल्लाहरुमा पनि प्रहरी कार्यालयमै पुस्तकालय स्थापना भैसकेका छन्।
कैदीहरुलाई नयाँ ज्ञान र सकारात्मक सोंचको विकास गर्ने जीवन उपयोगी पुस्तकहरु पुस्तकालयमा राखिएको छ। उद्घाटनमा देशका चर्चित लेखकको समेत सहभागिता रहनेछ।
कारागारलाई किताब अभियान मूल समितिका संयोजक डिआइजी शाहका अनुसार उद्घाटनमा सुर्खेत कारागारमा वरिष्ठ साहित्यकार सनत रेग्मी, वरिष्ठ उपन्यासकार एवम् कथाकार नैनराज पाण्डे, कवि नवराज पराजुली दैलेखमा निबन्धकार शेखर खरेल र उपन्यासकार तथा कथाकार कुमार नगरकोटी आउने छन्। सल्यानमा उपन्यासकार उमा सुवेदी र रामलाल जोशी, रुकुम (पश्चिम) मा कथाकार राजेन्द्र पराजुली र निबन्धकार कुमारी लामा, जाजरकोटमा उपन्यासकार अर्चना थापा र सुविन भट्टराई, कालीकोटमा उपन्यासकार युग पाठक, जुम्लामा उपन्यासकार सिवानीसिंह थारु र डोल्पामा उपन्यासकार तथा कथाकार अमर न्यौपाने पुग्ने छन्। पुस्तकालय स्थापनाको औपचारिक कार्यक्रम सकिएलगत्तै लेखकले कैदीसँग साक्षात्कारसमेत गर्न कार्यक्रम तय गरिएको छ।
यस्तै पुस्तकालयको निगरानी र संरक्षणको लागि प्रत्येक कारागारमा ‘बुक क्लब’ समेत गठन गरिएको छ। गठित समितिले कारागारमा प्रत्येक शनिबार कैदीसँग र पुस्तकमाथिको समिक्षा गर्नेछ। कैदीले अध्ययन गरेको पुस्तकको समिक्षा र अध्ययनको आधारमै महिनाभरी सबैभन्दा बढी पुस्तक अध्ययन गर्ने कैदीलाई पुरस्कृत समेत गरिने छ।

नेपाल समयको सहयोगमा

Leave A Reply

Your email address will not be published.